On-line, off-line

மேலே உள்ள ஆங்கிலச் சொற்களுக்கு நண்பர் ஒருவர் தமிழில் இணைச்சொல் கேட்டிருந்தார். நம்மில் பலரும் இதில் முகன்மையான line இற்குச்  சொல்லைத் தேடாது, on, off இற்குச் சொல்தேடிச் சுற்றிவளைத்து ஒப்பேற்ற முயல்வோம். என்னைக் கேட்டால் பல இடத்தும் பயனுறுத்தும்படி line க்கு ஒரு பொதுச்சொல் காணாது இக் கலைச்சொல் சிக்கலைத் தீர்க்க முடியாது என்பேன். 

பொதுவாக,  line க்குக் கோடு என்றே பலரும் சொல்வர். ஆனால் அது மட்டும் இணைத் தமிழ்ச்சொல்லல்ல. கோடலின் அடிப்பொருள்  வளைதலே.  “சரி, நேர்கோடு” எனச் சிலர் சொல்ல விழைவார். அதுவும் முரண்தொடையே. அடிப்படையில் 2 புள்ளிகளை ஒரு கயிறால் கட்டித் தொடர்புறுத்துவதை  line என்பார். ஆங்கிலத்தில், இப்படியே வரையறுப்பார். கயிறு தொய்ந்தால், சரியான தொலைவைக் காணவியலாது. இழுத்துக் கட்டியே line நீளத்தை அளக்க முடியும். 

line (n.) a Middle English merger of Old English line "cable, rope; series, row, row of letters; rule, direction," and Old French ligne "guideline, cord, string; lineage, descent" (12c.), both from Latin linea "linen thread, string, plumb-line," also "a mark, bound, limit, goal; line of descent," short for linea restis "linen cord," and similar phrases, from fem. of lineus (adj.) "of linen," from linum "linen". 

இழுக்கப் பட்டது (to draw, to pull, to haul) தமிழில் இழையாகும். திருக்கு (torque) ஏறாத நூலைக் குறிக்க இழை என்ற சொல் பயன்பட்டது. எல்லா இடத்தும் பொதுக் கலைச்சொல்லாய்ப் இழையைப் பயன்படுத்தினால், புரிதல் குழப்பம் கட்டாயம் ஏற்படும்.  அதே பொழுது, இழை என்ற சொல் filament இற்கு வெகு சிறப்பாய்ப் பொருந்தும். 

கயிறு (string) நூல் (spun), கோடு, திரி என வெவ்வேறு சொற்கள் வெவ்வேறு விதப்பிற்குப் பொருந்தியவை. (திரி என்பது பஞ்சைத் திரிப்பதற்குப் பயன் படும். thread இக்குச் சரி வராது. திரியீடு (= திருக்கு இடு) என்று திரித்து நான் சொன்னது ஒரு பேராசிரியருக்குகுப் பொறுக்கவே இல்லை. ”ஆங்கில ஒலிச்சொல்லை நான் படைக்கிறேன்” என்று  திட்டிவிட்டார். இங்கே சொல்லும் line இற்கும் அவர் திட்டத் தான் போகிறார். இருப்பினும் செய்கிறேன்.

இழை, நூல், திரி, கயிறு போன்றவற்றோடு தொடர்புடைய, அதே பொழுது line எனும் புதுக் கருத்தை உள்வாங்கியதாய் ஒரு சொல் வேண்டுமென நான் நினைத்தேன். 

இழுக்கலை இழுவல் (இழுவு-அல்) என்றும் சொல்லலாம். இழுவென்பது இழுக்கும் தொழிலைக் குறிக்கும்.  இதை இழும்/இழுன் என்றும் சொல்லலாம். எனவே இழுக்கப்பட்டது இழுவை/இழுமம்/இழுனம்/இழுனை என்றாகும். இழுத்துக் கட்டுதலை இழுமுதல், இழுனுதல் என்றும் சொல்லலாம். இழுமம்/இழுனம்,  அல்லது இழனை என்பதை line க்கு ஈடாய்ப் பயன் படுத்துகிறேன். இதுவரை எந்தச் சிக்கலும் இப்பயன்பாட்டில் நான் காணவில்லை. இதன் வினைச்சொல் இழுனு-தல் என்றாகும்.

நாம் நடத்தும் ஒரு செலுத்தில் (process),  சாரா வேறி (independent variable)யின் மதிப்பில் சற்று வேறுபட்டால், சாரும் வேறியும் (dependent variable) அதே விழுக்கு வேறுபடுமெனில், இத்தகை உறவுள்ள செலுத்தை, இழுனியச் செலுத்து (linear process) என்றும், கன்னா, பின்னாவென அளவிறந்து சாரும் வேறியில் நிறைய விழுக்கு வேறுபடுமானால் இழுனாச் செலுத்து (non-linear process) என்றும் இற்றை அறிவியலில் சொல்வார். 

இழுனிய செலுத்தில் அதன் சாய்வு (gradient) மாறாது இருக்கும்;  இழுனாச் செலுத்தில் சாய்வு மாறிக்கொண்டே வரும் (gradient will keep changing). இழுனாச் செலுத்துகள் பலவும் அவற்றின் வாகு(behaviour)களால், இன்றும் அறிவியலில் புதிராகவே உள்ளன. அதனால் பலரும் இவற்றை ஆழ்ந்து படிக்கிறார். கணிப் பயன்பாடு கூடிய பிறகே,  இப் படிப்பு ஓரளவு பெருகி யுள்ளது. 

இப்போது கூட்டுச் சொற்களுக்கு வருவோம். இதில் நான் இயலுமையை மட்டுமே சொல்கிறேன். இவற்றைக் காட்டிலும் சில இடங்களில் பழகிய சொற்களையே பயிலலாம்.

linear = இழுனிய

airline = பறப்பு இழுனம்

align = இழுனாக்கு

baseline = அடியிழுனை/அடியிழை

bee-line = தும்பி இழுனை/தும்பியிழை

borderline = வரம்பிழுனை/வரம்பிழை

byline = எழுதிழுனை = எழுனை

clothes-line = துணி இழுனை/கயிறு

coastline = கடற்கரை

curvilinear = சுருவு இழுனை

dateline = நாள் இழுனை

deadline = முடிவு இழுனை

delineate = இழுனப் படுத்து

flatline = மட்ட இழுனை

front-line = முன் இழுனை

guideline = காட்டு இழுனை

hairline = முடியிழை

hard-line = கடு இழுனை

headline = தலை இழுனை

hemline = முன்றானை

இனி, 

on-line = இழுனை(யின்) மேல்

off-line = இழுனை(யை) விட்டு

switch on = மேற்சொடுக்கு

switch off = விடுஞ்சொடுக்கு